Árboles
Ayeri, miércoles, tevi
precisión de dir al bosque que queda mismamente debaxu'l Soberrón.
Valióme la pena una hora de camín pisando llamazales pe las
caleyas, por más que lo admiro pa contra mí, no jallo cosa más
guapa qu'un bosque; debaxu los robles y las castañares paeme que toy
atopada y sin querelo, alcuérdome más de Dios que é el que los
discurrió y los jezo...
Hay tantu que admirar y que considerar...
Si amiro pa baxu, el mofu
suavin júndese al pisalu, la jueyas cadías ruxen contra las
madreñas..., ruxen con música..., jueyas llargas de castañar,
jueyas reconcomiadas de robre, jueyinas chicas d'ancina, o reondinas
d'alisal... Si amiro parriba, el sol métese per entre las jueyas
verdes y allega al suelu a poquitinos, el viento jaz otra música
distinta con las jueyas vivas; los páxaros de caña en caña,
candunu col su pío...
Pos si amiro unu por unu de
cada árbol tién algo suyu, un daquel distintu; los robres son
altos, pero de cada robre no se paez al otru, no hay dos robres
ermanos; unu más llargu, otru más oscuru o más verde, o más
pardu; las castañares toas son retorcias, pero tamién se extreman
unas de las otras...
Volviendo a los robres, ello
ye que hay unu, conózulu yo va muchu, que e el rey de los robres,
pame que de tou'l conceyu. Quedó solu, el probe; tiempo va haberá
tuvíu alredior collacios como elli y entre todos jarían bosque,
pero esti que yo digo, viólos morir unu por unu, sabe Dios de qué
manera, y elli, al quedase solu, entainó a ensanchar pa to los laos,
y jízose fuerte, grande, copudu... Elli solu val tantu como un
bosque enteru; la su rolla no i la abrazan ni tres hombres; el suelu
que'elli asombra e cerca d'un día de gües, y las sos cañas ¿quién
las podrá cuntar? Llenas de ñeros en primavera, aquello paez un
mercau de paxarinos cantando...
Vide una noche salir la lluna
per entres las sos cañas... era grandona, reonda, collorada... vinía
de la mar... Diba subiendo despacín, despacín, bixorduella y
zajorilla, y las jueyas pintaban i enriba dibujos negros tou'l tiempo
distintos...
Quedeme sin sollutir, como
agüeyada...
Biérame gustau gritar y no me
atrevía a gañir...
No se me escaez del pensamentu
aquella noche...
-----
No hay comentarios:
Publicar un comentario